Laubbläsers Schuld

Jetzt gots mea los en alle Strossa
Auf geht’s jetzt weard Laub geblosa
Dr Oine blost zom Nochbr numm
Mit seim Laubgebläsedrumm
Do drauf vom Nochbr hearsch an Schroi
Paß af mei Freind i hilf dr glei
Er nemmt do drauf sei Blosmaschie
Ond blost dees Laub zom Nochbr hie
Doch der stellt ei an heara Druck
Ond blost dees Ganze wiedr zruck
A´ weitra Nochbr stellt se ei
Zu deara Laubgebläserei
Em Trio blosans jetzt wia wild
Worauf mir jetzt dr Graga schwillt
I mach mi do drauf auf dea Weag
Ond hol mr jetzt mei Kettaseag
Schmeiß se ah ond dreh recht auf
Was Andre moinan scheiß doch drauf
Mei Zwoitakter der macht an Krach
Do drauf weard jetzt mei Nochbr wach
Ond weil den Krach er net vrstoht
Er jetzt en sein Schupfa goht
Auf oimol kommt ein Lärm ons näher
Dr Nochbr kommt mem Aufsitzmäher
Ganz ohne Auspuff wia ma heart
Der nächschte Nochbr sich beschwert
Er tobt isch rasend voller Wuat
So viel Lärm duat eahm net guat
Er isch narrisch stinkad sauer
Seither baut er a Lärmschutzmauer
Schuld an allem isch dees Laub
An Haufa Dreck ond recht viel Staub.
Schuldig an den Auspuffgasen
Isch jener wo hat Laub geblasen

© Dieter Elmer 10 /2020