Ein Wannerung ann hittsten Dach int Johr - 28.07.2013

Dor sitt ick hüüt Morgen an denn PEZEH in uns lütt Stuuw un schriew. SEI kümmt hinnersinnig tau mi ran - SEI, datt iss mien Frau - nu schon bald sößtich Johr – un wenn Sei so kümmt, sall datt watt bedüüden. Deiht datt ook dittmal. SEI löppt schon siet vääle Johren fast jeden Dach bi gaud Wäärer ehr Streck uut Gesundheitsgrünnen un disse Streck iss so üm dei 11.000 Schritt inn´ höchsten Fall lang. Worüm ick datt weit? Täuwt noch ein bääten un Ji verstaht datt denn ook.
Nu trüch tau mien Frau, SEI will mi hüüt oewerlisten un meint, wi woelen ein niege Streck gahn, denn mit dei Sünn iss hüüt morgens schon gegen NÄÄGEN nicht tau Spaßen un denn ierst ann Nahmiddach.
Ick denk glieks ook oewer mien Gesundheit na un bün dorbi, denn nich datt Wannern allein iss gaud, nee, datt watt man so allens näbenbi mitkricht!
So dei Waarerpütt mit dei Wolken dorrin dei väälen Blaumen, dei Schmetterlinge, datt Weitenfeld mit dei Mahnblaumen ann´ Rand - schon werrer gääler worrn in dei letzten Daach, dei Wieden un Knicks, dei blage Himmel mit dei witten Wolken, dei Radfohreres, dei mit uns dei Asfaltstraat deilen un sicher an denn Strann na Warnmünn woelen, dei schönen niegen Hüüser un Gordens dorvör, dei Stockrosen nich tau oewerseihn, dei witten Käuh un dei Schimmel, dei indrächlich up dei Koppel datt Gras fräten un nich tau letzt dei Schatten von datt vääle Grootgreun.Wi kamen an denn Vorfluter vörbi, dei datt Waarer von dei Ackers wech“bringt“ un hüüt vull mit Aantenflott bedeckt iss – ein gaudes Furrer för dei Wildaanten, dei hier tau Gast sünd.
Dei Wannerung iss nu schon tau En un ick will nu ook noch verraden, woher SEI, mien Frau, dei Schritt behöllt, dei SEI gahn iss. Ick heww Ehr mal einen Schritt-marker gäben un wüsst, dei iss bi EHR gaud anlecht.
5.589 Schritt´ = 3.632 km
Stimmt, denn nu hett SEI denn lütten Marker schon so lang´n, denn de Batt´rie iss schon wesselt worrn - ahn Energie kein Marken, so iss datt ook bi de niege Technik. Sonne Marker hett uns Gemeinschaft vör Johren mal von dei Berliner Frugens - Ministerin för uns Projekt krägen. Mindest föftich Wanneres hebben datt awkrägen un nutzen betimmt datt Ding ümmer noch tau ehr Gaudes.
De Tied iss ook woll för Sei, de Lääsers, vergahn. Ick heww ann Namiddach mien Bein spüürt un mit ehr tau dauhn hatt, Lääd hett mi datt oewer nich dahn. Ick bün ook up mien Kosten kamen un mit mien Kamera werrer Nieges festhollen - Ji hebbt datt miterlääwt.

Hans Jürgen Grebin - 2013-07-28