Und der Schornstein der raucht……….

Des Heizöl koscht an Haufa Geld,
was em Konto net gar g’fällt.
Doch in dr Schtub isch es kalt
und dr Winter, ja der kommt bald.

Friera in dr Schtub isch gar net schea
und s’Kerzaliacht duat koi Wärm net gea.
Kuschla unter’ra so warma Deck
dät erülla au no grad dean Zweck.

Doch wia macht ma’s Badewasser hoiß,
ohne Öl und ohne Schtrom, wenn des oiner woiß?
So überlegt ma mal ganz oifach halt
wia’s Haus und s’Wasser nemme kalt.

Feschte Brennschtoff, mai sch ja net domm,
dia liegad eh bloß üb’rall rom.
Und brennbar, des ka so vieles sei,
bringt a Hitz au no glei obadrei.

A Holz, des liegt dussa frei em Wald,
des holt ma mit em Auto halt,
a paar Tannazapfa no glei in de Säck,
ndes dau dussa au scho weg.

Und was dahoi no alles liega ma
des au ganz guat no brenna ka.
Alte Schuah, lang scho nemme braucht,
mei Gott, wenn’s au a bissle raucht.

Verpackungsmaterial hat ma g’nua,
des duat ma au no mal dr’zua.
A altes G’wand, koiner duat’s meah a,
Des duat ma zum verbrenna no dra na.

Au s’Plaschtik dät a Hitz aa gea,
des nemme futt doa isch au ganz schea.
Wenn ma dau eascht richtig rauma duat,
dau geit’s viel des geit a rechta Gluat.

A g’scheiter, guater Ofa hält des aus
und warm isch s’Wasser und des ganze Haus.
A Heizöl, des brauch mer nau nemme meah,
des könnad se nau de ganze Reiche gea.

Sait zu deam nau oiner keck
„fer d’Umwelt isch des lauter Dreck“,
nau hearsch dau bloß, so richtig frech,
„dann hat d’Umwelt halt ma no mal Pech“