Die politische Showbühne.....

Wenn ma des ganze rund um dia Politik so sieht, es wird immer meah zur Show als wirklich zur ernschta Arbad und zum Auftrag dean dia Dama und Herra vom Volk kriagt hand. Wichtig isch a guates Bild abzugeaba und wichtig isch au dean Dialog, dean scho mal Konrad Adenauer von sich geaba hat, „was gad mi des g’schätz von geschtern heit no a“ hoch zum halta und dean minütlich im Kopf zu hau.

Koi deutsche Landrätin oder Landrat isch so oft wieder mal im TV – Talk zum seah wia dia aus Fürth und Schtoiber – Rebellin Dr. Gabriele Pauli. Und falls ma doch nach so viel Rampenlicht wia ma se zum Schturz von Schtoiber g’hett hat net ins Abseits kommt, lasst ma sich was andres eifalla.
Wia erscht soll ma Politik no nemma?
Sicher isch es jedem freig’schtellt und au de politische Größa, des zum doa, in seiner Freizeit, was oim Schpaß macht. Welcher Glauba schteckt no dr’hinter? Heit wird des g’schwätzt was morga scho nimmer wauhr isch. Erscht felsafeschte Politikerin, dann scho wieder mal koi Periode meah sondern freie Wirtschaft, dann Fotomodel und dann wieder von Herza Politikerin! Nur damit ma immer schea in dr Zeitung und im Fernsehr isch????
Auf jeden Fall, a Frau Dr. h.c. Merkl ka mit ra Frau Dr. Pauli net konkurriera.....

Merkl und Schtoiber wieder mal oder all no im Ausland unterweags. Und unsre Kanzlerin lasst sich geara feira. Und wenn des im oigena Land net ganz so oifach isch, dann eaba im Ausland. Guate Tipps und Ratschläge vertoila dia im oigena Land net fruchtad und schon kriagt ma an Ehradoktortitel. Ehrsüchtig isch eaba wichtig in dr Politik. Und wia Schtoiber, bevor ma abtritt, ob freiwillig oder net, dann isch es wichtig no schnell an Titel zum holla, hat doch dr Franz Josef au dean h.c. Doktor vorna weg g’hett. No a bissle Show bevoar ma abtritt und no a paar groaße Verschprechunga, und scho sieht dia Welt wieder ganz andersch aus.

Politische Showbühne, voar unsre Auga wird g’schtritta und hinta rum mitanander g’soffa und g’fressa und g’lachad. G’lachad drüber, wia ma uns doch wieder mal für blöd verkauft hat. Wird drüber g’lachad über uns Marionettafigura dia gar koi Courage dr’zu hand aufzumschtanda und an andra Marsch zum blausa......