Wo geht's mit dr Krumbacher Wirtschaft na?

Wenn man Zeitung aufschlägt und nei guckt wer denn scho wieder alles nui Baua duat, nau ka oim des Herz scho höher Schlaga, isch ma sich doch au sicher das es wieder mehr Arbeitsplätze gibt, meahr Lehrschtella und dass oifach alles a wenga wieder zu booma anfängt. Und sowas duat au a jeder Kommune bloß guat wenn meahr Geld ins Kasse kommt, durch Gewerbeschteuer. Uns so aoll es dann eigentlich scho selbschtverschtändlich sei für a jede Kommune dass ma em jeda Betrieb für a solcha Erweiterung Möglichkeita schafft sich au am Ort zum erweitera, ja sogar entgega kommt. Sofern ma des in ra Kommune au will.

Wenn ma sich vorschtellt wia groß doch dia Krumbacher Schpedition g’worda isch, wo se doch überall neue Lagerhalla errichtad hand. Neaba Neuburg isch jetzt Ellzee dra. Oi Halle schtad scho, a zwoita kommt no dra. Ja, es isch am Bahnhof Ellzee a richtiges Induschtriegebiet entschtanda. Und koim duat des dau draußa waeh, und doch em Gemeindesäckl guat. Au dr Faischt wird immer größer dau dussa. Beide hand amal en Krumbach ang’fanga und wia so viele andre, sia hand sich en Krumbach net vergrößra könna. Wenn ma sich a wenga umguckad, so hat es a jeda Kommune g’schafft a g’scheit’s Induschtriegebiet zum schaffa, in Krumbach ich des bisher immer no mißlunga.

Aus deaner einschtiga Schual – und Behördaschtadt mit Induschtrie dr’zua gad es sachte weiter bergab. Des Krumbad als Wirtschaftszweig mit deane ganze Gesundheitsreforma ka ma au nimmer so werta. Dia Behördareform vom Schtoiber lässt au zum Wünscha übrig, denn der Abbau isch ja scho klar entschieda. Und Schuala, dia koschtad Geld und au dau wird nimmer viel an Aufschwung zum verzeichna sei. Und auf da Fremdaverkehr durch Legoland zum hoffa, so schea Krumbach au sei mag, dr ganz große Anziehungspunkt wird es nia werda. Ob es net doch mal an dr Zeit wär sich Gedanka zum macha wia ma wieder a bissle Attraktivität ins Schtädtle bringt und aus de Fehler von früher zum lerna und umzumdenka?