Wia wird ma heut Superstar?

Es isch ja heit koi Geheimnis mehr, dass es dia heutige Technik möglich macht au Musik zum macha. Mit der heutiga Technik isch es locker zum schaffa aus ma Piepsgesang an herrlicha Opernarie zum macha. In de heutige Schtudios hat ma alles und, wia scho mal g’schrieba, sind es schlecht bezahlte guate Schtudiomusiker dia unsre CD’s einschpielad, dia mir kaufad und hoffad unsre Orginalinterpreta zum kriaga. Dia jedoch kassierad des große Geld ab.

Unser Schtaat, des Land, dr Bezirk, sia unterhaltad Musikschuala, teuer, so das dia Augsburger Hochschual zu macha muass. Mir hand immer no in Deutschland sehr talentierte Musiker, Instrumentalisten und Vokalisten, doch wer isch auf dr Bühne als Superstar? Irgendwelche Kaschper dia mit viel Technik und ohne eigenes Talent und ohne jede Qualität Milliona abkassierad. Des beschte Beischpiel isch au Dieter Bohlen, der no nia an richtiga Ton troffa hat, heut aber über Gesangstalente entscheida derf.

Sicher isch des Saxophonquintett schea anzuhöra, doch auf em Bildschirm, im Fernseh hört ma ganz was andres. Sogar auf dr Bühne isch koi oiziger Ton von deane selber g’schpielt. Aber was jammern mir denn eigentlich, mir machad doch so manchen, oft arroganta, sogenannta „Künstler“ erscht zum Schtar! A bissle Kaschper sei und guat ausseha, des roicht aus und isch mehr wert als alles Talent was in ma Menscha schteckt. A guate Fraug isch, braucht ma no a Talentförderung wenn jeder untalentierte zum Superstar wird?