Maibaumstehlen, ein alter Brauch und immer aktuell

A Brauch aus vergangener Zeit
Hat manchen Verein scho gereut
Wenn er sein Moibaum hat scho g’richt
Und herrlich mit Tafla scho g’schpickt.

Denn wia scho allzeit der Brauch isch
Voar bease Leit nia sicher bisch
Dia es auf dean abg’seah scho hand
Und verziagad eahn über’s Land.

Passiera duat des allwei meah,
au in mancher Schtadt soll’s des gea,
en Leitershofa dieses Jauhr
isch Wirklichkeit und isch’s au wauhr.

En Krumbach war’s net ganz so schlimm,
dau hat ma bloß oins g’hett em Sinn,
der Gipfl an deam Baum muass dau weg
und hat’n braucht an an ganz andra Fleck.

Ganz Ratlos isch ma nau erscht g’wea,
der Gipfl, a war der doch so schea,
hat grad zu deam Baum au na g’heart,
jetzt fehlt er, isch des net arg g’schert.

Doch beim Krumbacher TSV
Geit es scho grad g’scheite Leit au,
so war es au gar net recht schwer,
a anderer Gipfl muass her.

Ja no mal jetzt fälla a Baum,
des ka ma ja wirklich au kaum,
vielleicht duat’s a klois Bäumle au,
des hätt ma sogar recht schnell dau.

So fällt es au deam Schportverei
Auch wirklich und g’wiß gar net ei
A Auslöse zahle an dia,
dia hand miaßa dean Gipfl verziah.

Jetzt lachad halt der TSV
Denn fertig schtad der Moibaum dau,
und dia, dia dean Gipfl jetzt hand
hand ang’richt net wirklich a Schand.