Krumbach – musikalische Kulturschtadt Nr. ois

Kaum a andra Schtadt wia Krumbach hat so viel Musik zum bieta wia Krumbach. Dau hand se a Vorreiterrolle dia se bewahrad. Was an Musik in Krumbach ansässig isch, dia Jung und Alt verbindat, des findt ma scho bald en ganz Schwauba net. Ja, ma ka saga, Krumbach, die schwäbische Kammelschtadt wo es singt und klingt.

Zum 50, mal, des isch a halbes Jahrhundert, geit es 2006 dia Feschtwoche. Dr Ausrichter isch, net wia en andre Schtädt d’Schtadt oder a Feschtzeltbetreiber, es isch dr Musikverein Krumbach. Seit 50 Jauhr isch er dr Garant dr’für das an dr Schtadtsaal – Wies ebbes gebota wird, für d’Leit aus Schtadt und Land. Von dr Jugendkapell ag’fanga bis zu des Alte, a jeder schtad dr’hinter. Dr beschte Vorschtand könnt des all dia Jauhr net schaffa wenn net seine Leit hinter eahm schtanda dädat.

Mit Pfeifa, Trommla und Fanfara ziagad se alle Jauhr durch unsra Schtadt. 2006 hand se jetzt ihren 50. Geburtstag: dr Schpielmanns – und Fanfarazug Krumbach. Längscht isch dia Zeit vorbei wo se bloß alte Märsch g’schpielt hand, modern mit Schlager und Evergreen wartad se heit auf. Verbindat d’Jungend mit dr Musik und zoigad was Kameradschaft hoißt. Live und ohne technischa Schnickschnack tragad se au dr’zua bei das mir a klingende Kammelschadt bleibad.

Glei mehrere Chöra hat Krumbach: Neaba dem alt bewährta Kirchachor geit es da Liederkranz, da Cantemuschor und da groaßa Chor dr Berufsfachschule für Musik, net zum vergessa dr Alpenvereinschor. Das des Singa in Krumbach groaß geschrieba wird, des beschtätigt au immer wieder a voller Saal im Hürbener Wasserschloss des „Gemeinsame Singa“ oimal im Monat. Alle dia hunderte Leit sorgad für a singende Schtadt Krumbach.

Und was Musik für a Kulturlandschaft isch, des beweist au all meah auf’s Nuie sowohl dia Volksmusikberatungsschtelle vom Bezirk Schwaba en Krumbach em ehrwürdiga Wasserschloss von Hürba. A Anlaufschtelle von Jung und Alt, von überall her. Zamma mit em Archiv für Volksmusik em alta Rathaus, a Einrichtung vom Landesverein für Heimatpflege, werrad alte Nota g’sammlad und wieder g’schpielt und g’sunga. Au dia zwoi Einrichtunga sind a groaßa kulturella, musikalischa Bereicherung fer unsra Kammelschtadt, damit se no meahr singa und klinga ka.

Wo dia oine oifach am Hobby Freid und Schpaß hand, dau wend di andre meahr drauß macha. Sia wend dr’mit Geld verdiena, weil Musik ihra Berufung isch. Dia kommad en Krumbach an Berufsfachschule für Musik. Dr Träger, dr Bezirk Schwaba hat scho g’wisst warum er dia Schual net en ma andra Toil vom Schwaubaland unterbracht hat, denn es geit bloß en jedem Regierungsbezirk von Bayern oina. Seit 23 Jauhr isch se en dr singenda und klingenda Kammelschtadt und hat Schüler aus ganz Deutschland. Und welche Talente dau raus kommand, des ka ma an deane groaße Veranschtaltunga jedes Jauhr wieder seah.

Und wia soll es scho andersch sei, so hat au dr ASM, dr Allgäu-Schwäbische-Musikbund sein Sitz in Krumbach, Schtadtteil Billahausa. Von dau aus warrad hunderte von Vereine und tausende von Musikerinna und Musiker en ganz Schwauba betreut. Au dia groaß Organisation trägt jährlich immer wieder mal dr’zua bei das es en Krumbach klingt und singt.

„Wo ma singt, dau lass di nieder, böse Menscha ham koine Lieder“ hoißt es so schea. Tatsächlich isch es so, Menscha dia Musik machad, dia singad sind weitaus glücklicher und zufriedanaer als solche, dia dr’mit nix anzumfanga wissad. Und grad Letschtere sind es dann, dia moinad, dau ka ma da Roatschtift a setza und rationalisiera. Zwar ka Krumbach von deane musikalische Leckerbissa, dia se hat net leaba und überleaba, aber no a greaßerer Fehler wär es sia alle nach dr Roiha falla zum lassa. Kaum, außer em Schport, verbindat so viele Menschen Jung und Alt mitanander.

En Krumbach klingt und singt es, a Aushängeschild wo ma sich zwar nix kaufa ka, aber trotz allem meahr als Schtolz sei ka, denn des oine isch sicher, musikalsich kulturell isch se wahrscheinlich d‘ Nummer eins in Deutschland!