Kneippkurort Krumbach, bald Realität......

Ma ka net saga Krumbach wär net schea und es dät dau koi Idylle gea. Es hat scho an romantischa Stil, wenn au dr’vo no net arg so viel. Unsra kloina Innaschtadt sogar a paar scheane Reize hat. So hin und wieder duat’s en unsra guata Schtub wieder mal an kloina Schub. Doch guckt ma mal a bissle bloß umher, scho viel an Läda schtandad leer. Wora des au allwei liega mag, des kommt sicher net so schnell an da Tag.

Des Krumbad isch ja a Perle fer sich, doch wia macht dau Krumbach no an Schtich? A Sanatorium no dau und dett, wär sicherlich a so au ganz schea nett. Doch wer dia wohl baut wo’s am G’sundheitshimml bloß no graut? Es kommt a Zeit, dau kommad bloß no nur die Reiche auf a solcha Kur. Dr Normale kommt dau nimmer na weil er’s net verzahla ka. Und dia nui G’sunheitsreform, ma wed’s seah, dia wirkt no enorm.

Verkehrsarm isch a andres Bad, kulturell und Freizeitmäßig gar net fad. Ma ka herrlioch schpaziera gau und muass net lang an dr Ampl schtau. Fuaßgänger hand Vorfahrt überall und des isch’s Krumbach net dr Fall. Und was hand andre Bäder doch für a Luft? Bei ons gibt’s bloß da LKW- Diesl - Duft. Doch des hätt ma ja scho arg lang in dr Hand, nau wär dr Transitverkehr an des Schtädtles Rand. Und so lang ma des verhindra duat, duat des dr Kneippschtadt gar net guat.

Es koscht g’wieß a haufa Geld des au net glei vom Himml fällt, doch wenn des au Arbeitsplätz geaba dät wär’s fer a solcha Planung no net d’schpät. Doch wenn ma Jahrzehnte dr’für braucht isch es sicher in a paar Jauhr wieder verraucht. Nett das ma sich jetzt scho Gedanka drüber macht bevoar es ganz System mal zemma kracht. Denn lang ka’s so nimmer weiter gau, fer d’Schadt muass ma a Perschpektive hau, nau ka’s au wieder sei das meahr auf Krumbach ziehad rei.

Heit wo en deaner Schadt grad alles auf em Prüfschtand schtad, Ämter wandrad glei em Trabb ois nach em andra oifach ab. Und bevoar ma hundert Kilometer fährt, was an oim scho a wenga zehrt, ziagt ma doch glei dau na wo ma ebbes schaffa ka. Und im Tourismus ka ma sa kommt Krumbach halt au nirgends na. Denn was dia Krumbacher Schtadt im Moment wirklich zum bieta hat isch ring rum a weng Natur und sonscht bloß Transitverkehr, und dean pur.

Illusiona im wahrschten Sinne bringad halt net grad dia Gewinne dia ma en ra solcha Schtadt mal braucha dät, weil halt seit fuchzig Jauhr dr selbe Wind no weht. Fehler dia ma friaher g’macht send net behoba heit so über d’Nacht. Warum hat ma en de guate Zeita net dau dra denkt und sich über Pfarrer Kneipp jeda Gedanka g’schenkt? Doch wia hau i net scho g’sait, der Weag zur Kneippschtadt isch no weit. Denn no hat Krumbach net des Bild auf des a Kurgascht wär recht wild. No liegt zuviel Abgas in dr Luft anschtatt ma g’sunda Duft. No quält sich zuviel an Verkehr durch unsra Kloischtadt doch scho sehr. No schtandad Ruina am Schtraußarand und leere Läda, fer dia sich no koi Käufer fand. Zwar isch dr Gedanke net untintressant doch vielleicht zur falscha Zeit bekannt.

Doch d’Hoffnung, dia schtirbt z’letscht und ma hat se no, mal seah ob des in zeha Jauhr au isch no so.