Kampf der Giganten

War jetzt wieder mal öfters auf dr Landschtrauß unterweags. Urlaub und Zeit hau i g’hett. So um de 190 lauft mei Passat mit seine 100 Pferdeschtärka au. Doch dau lauft nau scho au ganz schea ebbes nei und gad beim Auspuff naus. Und so bin i nau wirklich mit 100 dau na g’fahra, und war dr’mit doch glatt a Verkehrshindernis. An de unmöglichschte Schtella sind dia an mir vorbei und hand überholt, das e manchmal glei d'’uga zua g'macht hau weil e denkt hau,
jetzt kracht’s glei.
Dr Kampf der Giganta!

Auf dr Autobahn, grad mal so schea um de 150 g’fahra, ma ka dau no ganz schea ebbes seah und hat alles im Griff. Wia a Schtrich warad se, dia an mir vorbei zoga send. Im Affazahn, wia wenn dr Teifl hinter eahne her g’wea wär, so hau i dean Anschein g’hett. Und nau hau i an LKW mit 160 überholt, dr’mit i halt schnell an deam vorbei komma bin, dau bin i nau au a wenga meahr auf’s Gas. Dau isch doch nau glatt oiner hinter mir, mit Blinker und Lichthupe, deam war i viel zu langsam. Dau muasch glei Angscht hau das dir net oiner no hinta drauf fährt, so isch der an dr Schtoaßschtang g’hangad.
Dr Kampf der Giganta.

Und was hat es all deane braucht? Irgendwo an dr Ampl isch er nau neaba oder voar mir g’schtanda. An Zeit, dau hat er gar nix raus g’holt, bloß oifach zoigat was er unter seiner Motorhaub hat, wia schtark er doch isch. Ja selbscht wenn in dr Innaschtadt irgendwo a wenga über dr voarschriebena G’schwindigkeit fährsch, bisch a Hindernis. Und nau wundrad ma sich wieder mal wenn es auf em Schlachtfeld „Schtraße“ so viele Doate geit. Wobei net die Raser in dr Schuld send, sondern mir, dia vielleicht a wenig auf da Schprit guckad, a wenga nach dr Voarschrift fahrad und a Hindernis darschtella deant.

Vielleicht sollt i dau au dia Motorradfahrer net vergessa, denn irgendwia send des scho wirklich „Organschpender“ auf dr Schtrauß. Zumindescht manche. Denn was fer Schrecka dia oim gea kennad, wenn bloß so zischt, dau isch es oft koi Wonder net wenn ma se irgendwo nau aufklauba muass.

Dr Kampf der Giganta, auf unsre Schtraußa, sia warrad immer meahr, dau ka dr Schprit koschta was er will, ma blaust alles beim Auspuff naus, denn dia 299 und meahr PS geand des ja locker her. Vielleicht sollt ma dau a nuies G’setz entwickla, das bloß no dia auf d’Autobahn derfad, dia wirklich 200 fahra deant, nau wär ma koi Hindernis meahr.