Große Umgehung für Krumbach????

Dr Schprecher vom Leitbild Verkehr, dr Mayer Werner hat jetzt wieder mal an Plan zur Hand g’nomma und guckad, wia könnt ma Krumbach am beschta umfahra. Dia Krumbacher Umgehung isch a Samenkorn, des ma scho voar 60 Jauhr in da Boda g’legt hat aber vergessa es zum gieaßa. Es hat Zeita geaba, da war Geld dau um so was zum verwirklicha, wo ma net bettla hätt müssa. Aber dia Zeit hat ma verschtreicha lau.

Jetzt schtellt sich im Krumbacher Rathaus dia Frage, ob denn des Verkehrsaufkomma wirklich so schtark wär um dia Überlegung überhaupt anzumpeila. Wenn ma Leit fraugad dia an dr B 16 oder dr B 300 wohnad, dia könntad dia Fraug scho lang beantworta. Bloß a mal a Schtund am nuia Kreisverkehr beim Munding na schtanda, und scho dät sich dia Fraug erübriga. Statt dessa wird hinterfraugt ob denn in Thannhausa dia Umgehung ebbes braucht hätt.

Wia au immer des dau so g’seah wird, des Verkehrsaufkomma von Krumbach hat weder Thannhausa no Burtabach oder Jettinga / Scheppach je g’hett. Ja, es isch a Autobahn – Zuabringer, aber isch Krumbach des net au? No im schtärkara Maße wia im Mindeltal. Denn net bloß das B 16 und B300 bei uns direkt durch gad, Krumbach isch au no Mittelpunkt von dr A 7, A 8 und dr A 96. Ob jetzt dau erscht Gelder in 10 Jauhr vorhanda sind oder jetzt, des ka ma schteura, wenn ma’s will.......

Es heart sich scho guat a, Bad Krumbach, Kneippschtadt Krumbach. Aber mal ganz ehrlich, wer dät sich dau in ra Kur wohl fühla wenn schtatt dr guata Landluft bloß d’Abgase von de LKW, Busse und Auto in dr Luft liegad? Wenn sich überall dr Verkehr durch Krumbach schlinglad? Tja und no hat der nuie Kreisverkehr au net des braucht was er bringa hätt solla, denn dr Schtau isch nach wie vor dau. Dank Ampel beim Chaplin / Blank. Aber ma isch des ja g’wohnt, Schtaatsmühla mahlad langsam!

Hartnäckigkeit zahlt sich aus. So hätt der Zubringer zur A 7 nach Obenhausa au erscht in 10 Jauhr ausbaut werra, aber dau hat ma deane Herrn Politiker halt auf d’Fiaß drabbad und guck a, jetzt wird scho baut und scho isch a Geld dau. Und wenn sich des Schtraußabauamt gega an Kreisverkehr beim Sankt Maria zur Umgehung von Thannhausa no so wehrt, der kommt, garantiert, weil sich Thannhausa au auf d’Hinterfiaß schtellt, wia se des mit der Umgehung scho doa hand. Und wenn dia Schtadt Krumbach sich massiv mal dr’für einsetza dät, nau käm au dia zuschtande, garantiert.

Aber warum schträubt ma sich dau dr’gega? A guata Fraug, a Antwort kriagt ma wohl net, dia ma reschpektiera könnt. Denn das mir z’weanig Verkehrsaufkomma hand und des a Umfahrung net rechtfertiga dät, des isch a Märchen aus 1001 Nacht. Es isch und klingt scho allwei komisch, alle negativen Aspekte kommad zur Schprache wenn ma andre Umfahrunga als Beischpiel her nimmt, leider aber nia dia positive. A Schtadtoberhaupt und Schtadtrat duat sich sicher manchmal schwer jedem Gerecht zum werda, aber soll es net au a wichtiger Augenmerk sei a Schtadt liebens – und lebenswert zum macha? So idyllisch und schea des Schtädtle au isch, es gäb trotzdeam no viel zum doa..... ma muass es bloß apacka und hartnäckig sei.......