Entsorgung frei Schnautze wo’s Platz hat

Es isch scho schlimm, a jeder Dreck muass heit ja au zehamal einpackt sei. Jeda Wuch kommad a Haufa Blätter mit Werbung fer was woiß dr Deifl net alles. Und wer ka denn heit des Zuig au no verbrenna? Also muass en Container oder da Wertschtoffhof. Doch was doa wenn der grad zua hat?

Selber schuld, hättad se offa wenn i Zeit hau und komm, nau duat ma’s halt dr’voar na. Wed scho jemand aufrauma. Manchmal isch sogar der Weag z’weit. Ma gad an nächschta Container, dr Kofferraum fascht voll. So a Pech, jetzt isch der au no voll! Mit hoim nemma, noi, und i werr in dr ganza Schtadt rum fahra und an leera suacha. Hättad dia dean g’leert bevoar i komma bi.

Also, was duat ma? Ma schtellt des Zuig oifach neaba na. Ma wär ja bled wenn man dau no mal komma sollt. Und wenn a Wend kommt, ja mei Gott, oiner wed des Zuig nau scho meah eisammla, fer was hat ma denn dia und fer was zahlt ma denn dia von dr Schtadt und vom Bauhof? Ja selbscht am Busbahnhof, nebr em Rathaus dana scheut ma sich net da Dreck an de Container abzumlada.

Ma heart und sieht des aber net bloß von Krumbach, auf de Dörfer dussa, in dr Schtadt Günzburg, üb’rall macht ma sich dia Sorga wia ma des en Griff griaga kennt. Dau ka ma Pfand für all’z mögliche eiführa, des hilft alles nix, denn irgendwo send manche Leit scho Drecksäu! D’Hauptsach en de oigene vier Winkl und drum rum isch alles sauber, wo anderscht, des schpielt gar koi Rolla, dau ka ma’s ja na werfa.

Aber wenn ma en d’Natur naus guckad, ja selbscht in de Weiher wird dr Abfall versenkt. Was ma nemme braucha ka wird entsorgt, koschtagünschtig und auf dia leichtescht Art. Ma muass aber au drzua saga, es wed viel produziert und auf da Markt g’schmissa wo ma no gar net woiß wo und wia ma ebbes entsorga derf und ka. So ebbes soll’s ja eigentlich au net geaba.

Aber wehe voar deane ihrem Haus oder Grundschtück dät so a Container schtau und es dät dau so ausseah, dau wär ma dr eascht wo sich em Rathaus beschwera dät. Aber wo andersch, dau schpielt’s ja wirklich koi Rolla. So a egoischtische Denka hand manche Leit und wissad gar net, aus Dummheit oder warum au emmer, das es letschtendlich ihre Gelder send dia ma braucht um alles wieder aufzumrauma. Ob sich dau dr oi oder andre net mal an dr Näs packa soll und überlega das es ja au sei Schtadt oder Dorf isch. A jeder Winkel der net sauber isch fällt auf jeda oizelna z’ruck. Hätt ma net weaniger Ausgaba im Schtadt – und Dorfsäckl wenn jeder a bissle mithelfa dät und sich saga „unsre Schtadt – unser Dorf soll sauber sei“?