Dr KRU 200

An Landkreis Krumbach hat es früher geaba,
und zwar bis zur Gebietsreform dau na.
Dr Rescht war dann net grad a Seaga,
wenn man des mal so saga ma.

Es gab no schnell a großa Grundsteinlegung,
a nuies Landratsamt hätt’s solla gea.
Für Krumbach war dia Überlegung,
a nuies Auto wär no schea.

Er war nix meah, der recht alte Dienschtwaga,
a nuier hat no schnell nau müssa her.
KRU 200 hat der derfa traga,
so lauft er nau in deam Verkehr.

Doch dann scho bald, ma hat es halt beschlossa,
kassiert ma Krumbacher von Günzburg ei.
Dr Landkreis Krumbach war verdossa,
von ra solcha Schildbürgerei.

GZ sind nau dia Autonummra worra,
und des 200 hat auf Günzburg g’heart.
dee war zerscht mal ganz leicht verworra,
für manche war’s scho richtig g’scheart.

Fer Krumbach’s Burges gabs GZ 300,
denn meah war Krumbach dann scho nimmer wert.
In Günzburg war ma dann verwundert,
mit was dr Winkler dau na fährt.

Der schwarze Benz mit deaner scheana Nummer,
fer Krumbach war er dann a Rarität.
Dr Georg Winkler war koi dummer,
wia Günzburg dau bloß gucka dät.

Am Landratsamt, am Parkplatz ja dau schtandat
Ja überall bloß no GZler rum.
Oi Nummer bloß schea schwarz umrandat
Hat dau no KRU und gar net dumm.

Ganz schtolz isch er nach Günzburg allwei g’fahra,
und hat’s deam Burges dau all meah mal zoigt.
Sei ganza Amtszeit, viele Jahra,
hat Winkler dau mit Köppler g’foigt.

Dr KRU 200 isch jetzt in dr Rente,
so wia dr Winkler jetzt scho lang meah au.
In der Garasch schtad er ganz dezente
Als Oldtimer gepflegt no dau.

Dr KRU 200 isch a Schtück Geschichte
Wo ma’m GZ 300 gar nie net weicht,
in langer Zeit ma no dr’vo berichte,
dau isch ma s’Krumbach scho geeicht.