Alle sind gleich......
Dau isch scho mal des leidige Thema mit de Renta. mit de Reforma. Unsre Kanzlerin verkündet dau lautstark „dass doch alle von einer Reform etwas spüren müssen, sonst wäre es keine Reform“! Ob ma dau mal saudumm frauga derf in wieweit a Politiker dau ebbes spüra derf? In jeder Reform wird einmal mehr bloß dr „Kloine“ g’schröpft, deam wird immer mehr in da Geldbeutel g’langt, dau wird immer no mehr Bereitschaft g’fordert. Aber hat denn oiner von deane dau oba in deane Regierungs g’sait, „auch wir müssen bluten“? Bei de Diäta, dau gibt es koine Einsparunga und au koine Nullrunda, dau greift au koi Reform, denn dia send ja nicht für Politiker g’macht, sondern bloß für dean, der sich net wehra ka, für da kloina Ma. Alle sind gleich zum behandla, bloß oine sind eaba doch gleicher.
In de Chefetaga, dau ka Müll produziert werda, Papierkörb g’füllt, des Recht hand dia oifach, aber wehe des würd a kloiner Ang’schtellter macha. Wenns net grad zur Entlassung kommt, dann wenigschtens zur Abmahnung. So weit sind mir heit. Milliona und Milliarda wandern durch Fehlentscheidunga in da Müll, alles wird unter dean Teppich kehrt. Dau hoißt es „was i derf gad di no lang nix a“! Ma lässt scho gern sei Führungsposition raus hänga. So ka mancha Führungsdienschtgrad sei Mannschaft, wenn au bloß bei ra Übung, ins Unglück renna, weil er an wichtiga Faktor ignoriert. Doch macht oiner aus dr Mannschaft oder a Gruppaführer bloß an unscheinbara leichta Fehler, so wird der vor versammelter Mannschaft an Pranger g’schtellt. So isch es eaba, es sind alle gleich, doch mache sind oifach gleicher.
Und hand mir net grad in unserer heutiga Zeit net an Haufa von Besserwisser? Austoila nach Schtrich und Fada, selber aber koi bissle Kritik vertraga. Bei de andre an jeda kloina Fehler seah, doch selber macht ma des selbe und des isch nau sogar noch recht. Parkplatzsituationa bei de andre monieren und selber parkt ma genauso blöd. Des Schaffa und organisiera von de andre ins lächerliche ziah und selber bringt ma au nix auf Bahn. Überall des „berühmte Haar in der Suppe“ suacha, bei eahne selber dät ma an ganza Haarschopf finda. Aber des sind halt genau dia, welche sich selber vor jeder Verantwortung drucka wollad, dia andre schaffa lassad um se hinterher kritisiera zum könna. So isch es halt, alle sind gleich auf deaner Welt, bloß oine, dia send halt doch gleicher...............