A Zuckerle mit ma bittra Nauchg’schmack......

Hört sich alles verdammt guat a: Deutschland im Aufschwung! Aber wia lang? So hoch des ganze jetzt au nauf gad, so weit und no viel weiter fällt des ganze im nächschta Jauhr wenn d’Mehrwertschteuer nauf gad. „Vor der Mehrwertsteuererhöhung noch kaufen“ isch dr Werbeslogan dean ma jetzt täglich öfters hört. Und beschtimmt kauft sich dr oi oder andre dau no an ganza Pack Schulda ei. Guat für dia Banka! Hochkonjunktur an alle Ecka und Enda, für dia nächschte Monat. Doch dann??????

Des Eikaufa attraktiver macha will ma in Krumbach. Es soll mehr Vielfalt her, was ja au richtig wär, bloß mit was soll ma dia Vielfalt zahla? Es muass an Wettbewerb möglich sei und geaba, denn heit ka koiner meahr so locker mal sich an Luxus leischta. Ma überlegt sich halt ganz oifach ob ma des jetzt braucha dät oder net, und fer was es wichtig wär. Und wer kommt dau net oft zu deam Entschluß: Na ja, eigentlich doch net? Es krankt oifach von oba ra am System. Es fehlt oifach des logische denka. Wenn sich a jeda Regierung mal frauga dät ob ma ebbes braucht, ob ebbes sein muass oder net, ob’s an Sinn macht, nau dätad mir vielleicht a wenga meahr im Geld schwemma.

Dia schwarze Lieschte vom Bund dr Schteuerzahler von 2006 beweist wieder mal, von Jauhr zu Jauhr ändrad sich aber scho absolut gar nix. Dia Politik gad mit unserm Geld um wia wenn es täglich nuies vom Himml regna dät. Was duat a bayerischa Regierung auf unsre Koschta in China? was hand dia dau für a Wissa g’wonna wo se bei uns anwenda könnad? Für mi war des a Betriebsausflug im höchschta Luxus. Brucka in Prärie g’schtellt dia net verwendad werda könnad weil’s Fehlplanunga send. 30 Milliarda hat ma aufdeckt, und ganz beschtimmt sind’s am End 90 Milliarda Euro dia unsre Regierunga verpulfrad hand. Zur Rechenschaft wird koiner zoga, zumindescht net von deane, bloß mir, des Fuaßvolk, des muass bluata.

Und wenn man denkt wia unflexibel in dr Politik g’schaffad, denkt und g’handlad wed. A jeder deät dau en dr freia Wirtschaft, halt dau wo ma ebbes leischta muass, scho lang g’floga. Wocha und Monate hockt a Gremium dana und beschließt a Nichtrauchergesetz. Hochbezahlte Leit diskutierad und was kommt dr’bei raus? Wenn ma’s g’nau nemmt a Schtund Arbad! Wenn dau glei a wenga bloß vernünftig denkt warra dät, nau hätt ma dia Lösung von deam Problem glei g’hett. Aber ma muass alles a wenga naus ziah, soscht hättad zwoidrittel gar koi Daseinsberechtigung.

I denk, jeder kloine Ma von dr Schtrauß der a bissle an klara Menschaverschtand hat dät meahr auf Bahn bringa als dia Hochbezahlte Politikerköpf. Aber wia all wei scho und überall, schnelle Lösunga und des no vom Volk isch ja eh nix wert. Alles muass a Haufa Geld koschta, alles muass langwierig sei, kompliziert. Ma ka aus jeder Muck an Elefanta macha. Und wenn jeder für manche Probleme so lang umanander doa dät, nau dät in unserm Land überhaupt nix passiera und mir wärad wohl all no in dr Schteinzeit.

Ma ka g’fasst sei was aus dr G’sundheitsreform bei deane Kaffeekränzla no alles raus kommt. Debatte und Debatte, bloß koiner an Ruck nauch geaba und doa wia wichtig a jeder von deane isch. I glaub, alles isch au dau scho so verfahra das eigentlich koiner richtig woiß wo es lang gad. Mir net und no weaniger die Damen und Herren in de Debatta. Am Schluss zahlt eh bloß wieder des Volk drauf. Aber des isch deane ja gleich, dia hand alle ihre Schäfla im trockena und mir miassad gucka wia mir zum schwimma kommad, damit koiner unter gau duat. Und wenn au a Zuckerle von deane no so siaß ausguckt und auf Anhieb schmeckt, a jedes hat glei au an bittra Nauchg’schmack!