Gesundheit

Gesundheit

Vor jedermann is et ne Plage, plaget dik de Koppweihdage,
doch dagegen hölpet hille, ut de Aftheke eine Pille,
un im Nu is et famos, du büst de Koppweih wedder los.
Doch just danah meld sik din Magen mit kodderigen Unbehagen,
hei fangt ok noch dat Kniepen an, is düsse Pille Schuld daran?
Ward dat Kniepen denn tau dulle, nimmst du’n paar Drüppen ut de Pulle,
dat Panzenkniepen gaht vorbie, du feulst dik wedder frisch un frie.
Gliegs na ne viertel Stunne dann, fangt din Darm dat Grummeln an,
ik befürchte ne Attacke, ik glöw ik kriege Flitzenkacke,
da hölpet denn kein Ach un Weh, nur ne Tasse „Stoppaastee“,
alle Stunne eine Tasse, denn gift wer Ruhe inner Masse.
Durch dat veele Durcheinanner gaht din Blautdruck utenanner,
watt mik da am meisten wunnert, de lütsche Wert is ower hunnert,
dat tau stoppen gaht ganz locker, mit twei Dragees „Beta Blocker“.
Düsse Dinger sünd nich öde, davon ward de Knoken spröde,
Kalzium as Kautablette, dat hölpt, da mak ik jede Wette.
Wenn du nu denkst du bist gesund, denn lacht din in’rer Swienehund,
un fangt im Hals dat Kratzen an, datau noch Hausten aff un an,
de Grippewelle gaht nu um, da hölpt nur „Antibiotikum“.
Davon krisst du dat grote Flattern, din Harte fangt lut an tau rattern,
de Pumpe löppt nich richtig rund, pass up, dat se nich taun Stillstand kummt,
dafor gift et doch „Makomar“, dat makt den Umloop wedder klar.
Din Blaut is nu en betschen dünne, datt klappt nich mehr, mit dem Gerinne,
doch, da gift et kein Verdruss, da hölpt’ne Spritze „Tetanus“.
Du büst nu sichtlich anneslaen, kannst nich mehr snurstraks grade gahn,
warst schusselich, vergätern schon, da wirket nur noch „Kortison“,
dütt is en echtet Wunnermiddel, dat sächt de Kierl im witten Kittel,
mosst nur den Beipackzettel lesen, denn biste fast schon ganz genesen.

Ehr ik datt alles just erdrage, behol ik miene Koppweihdage.

Günther Jatzkowski 6.11.2005