Was doch net alles schtört

Nachts um halba oins gad erscht mal d’Sirene, glei drauf fahrad a paar so halbnarrade Fuierwehrler mit quitschade Roifa umanand. Und nau ka ma’s au no verwarta bis dia halbnarrade mit ma getöse durch s’Schadt fahrad. Glei di halb Nauchbaurschaft wacht auf. Zehn Auto und meah, es ma gar nimmer aufhöra. Also ob denn so ebbes sei muass? Des wird sich g’fraugad, ob aber dia halbnarrade Fuierwehrler vielleicht dau durch a Leaba, wenigschtens aber a hab und Guat retta könnad, des interessiert net, denn oim selber isch dr Schlauf doch ganz wichtig.

Dr oine aus dr Schtadt, a Haufa Geld auf em Konto, kauft sich a nett’s Anwesa auf em Dorf, denn er will sich dau ja erhola. Jetzt ka der arme Kerl aber net ausschlaufa, denn am Nachbarhof hat ma an Gockl und dia Kirchturmuhr, dia isch au z’laut. Also wenn oiner scho aus der Schtadt en so a kloins Kuahnescht ziaht, nau will ma schließlich au wirklich sei Ruah hau. Was doa, wenn der Bauer sein Gockl net weg duat, a richterliche Verfügung wett eahm des scho saga das des a Ruheschtörung isch. Tja und au dia Kirchaglocka, des Läuta, des muass abg’schtellt werda, wo dät mer denn dau na komma, schliaßlich will ma ja ausschlaufa könna.

Und dann der Nauchbaur, ma hat sich ja no nia groaß leida könna, jetzt dät der am hella Samstag nachmittag mit sei’m Rasamäher anfanga und an Krach macha. Grad jetzt wo i doch mein Nachmittagsschlauf halta will. Und des Grilla am Aubad, wo dr ganze g’schtank rum kommt, des wird i deam scho au no unterbinda, soooo gad es ja net, was bildt denn der sich ei? Deam werr i beim nächschta mal schon Polizei auf da Hals hetza, und wenn des net roicht, nau sieht ma sich voar G’richt wieder. Mir ka ja nix passiera, i selber hau nix und alles andre zahlt dr Schtaat.

Send mir net arm g’worda? Send net aus deane frühere Hoigartaleit heit Egoischta g’worda? Guckad mir denn bloß no auf uns, dass mir es schea hand und werfad da Dreck über da Zaun. Regad mir uns net scho bald über alles auf was uns net en Kram passt? Gibt es des Wort Kulanz oder Kompromiß en unserm Wortschatz scho gar nimmer? Net umsonscht send heit dia Gerichte so überlaschtad.