Angscht und Bang............

Jetzt isch dr Ärzteschtreik au bis auf’s Land komma. Alle und an jedem will unsra Regierung an da Kraga. Wia hat’s no so schea g’hoißa, Bürokratie muass abbaut werda. Des oinzige was abbaut wird isch des Vertraua auf dia lockre Reda von dr Politik. Das a Doktor, gleich welcher Art, am Hungertuach naga muass, des könnt ma net saga, wenn ma sieht mit welche Limusina dia umanander fahrad, welche Häuser dia schtanda hand. Das a Notarzt, der zum Toil 48 Schtunda schaffa muass, unter Umschtänd wenn’s dick kommt, sogar am Schtück, des send scho harte Brocka. Aber vielleicht wird des erscht oim Bewusst wenn oiner oder a solcher selber unters Messer muass.

Jetzt wird g’schtreikt, aber gega dia Bürokratie. Ma will das weaniger Leit an Doktor aufsuachad. Es soll ja Leit gea dia gnua Zeit hand und wegs jedem Hennadreck in Praxis schprengad. Aber es soll ja au wirklich kranke Leit gea, und wenn man sich so umguckt, dann send es grad wieder unsere Alte, dia halt scho ihre Wewechen hand, aber g’weiß net zum Zeitvertreib und zum ratscha in da Wartesaal gand. Wenn jetzt nau no 5 Euro dr’für herg’nomma werda müssat, damit ma a dingend noatwendiga Schpritz kriagt, nau roicht bei manchem arma Male oder Weible d’Rente gar nemme aus.

Und so wird wieder mal selber kuriert, holt von dr Großmutter des vom Pfarrer Kneipp g’schriebene Hausmittelbuach raus und versuacht sich selber dra. Ob dia ganze Hausmittala uns grad so alt werda lassad wia dia Doktorbesuche, vielleicht schtirbt ma na a wenga g’sünder, und vielleicht schneller. Des wär em Vater Schtaat beschtimmt au net unangenehm. So dät er scho wieder a Rente schpara. Manchmal möchte ma scho a Mäusle sei oder gar a Gehirnzelle, um rauszumfinda was denn en so ma Hirn voar gad der immer bloß auf die kloine runter druckt. Ma wünscht ja koim was schlechtes, aber dia solltad scho au a mal, und wenn’s bloß für a kurza Zeit wäre, in so a Situation komma wo dr Cent wirklich no a wertvolles Geldschtück isch.